(1978)
Nêss mundo um nacê
Tudo nu peladim
Um’ bem ta espendê de tchôm
Um prendê sentá
Um’ prendê rastá
Ês insnam’ andá na tchom
Num ambiente modesto
Pobre e feliz
Ta bai de môm em môm um criá
Bençoádo pa nhôr Deus
Um’ prendê sorri
Um’ prendê tchmá mãe, mamãe
Um prendê conchê gente
Brincá, gritá e cantá
Depôs já grandim
Sabido um’ falá
Pa escola ês mandam’ bai
Pa prendê alê
Pa prendê contá
Prendê sina nha nome
Na nha juventude
Tude era banal
Na meio di bondade e amor
Mundo era ôte cosa
Co gente diferente
Tinha menos maldade ma ódio
Óne bá ta corrê
Nha mundo bá ta mudá
Um’ saí pa estrangêr
Rodeód de faristeu
Na meio di fêl ma sangue
Um’ tive sabe e margôse
Sete mar um corrê
Tudo sempre ta aventurá
Na evolução di vida
Ma preto, ma branco
Um conchê mundo inter na trôte
Ta buscá progresso
Ta cumpri um distino
Nêss mundo cigano qui Deus dam’
Ma um’ ta sinti feliz
Ter nascido cabo-Verdiano
Direitos Reservados
(Editing/Publishing)
Manuel de Jesus Lopes (Manuel d'Novas)
SPA
SACEM
Africa Nostra
Harmonia
2 comentários:
"...Ma um'ta sinti feliz
ter nascido cabo-verdiano"
Palavras que ta toca mas que curação: ta toca kel essencial de nôs existência insular. Obrigada nha tio. Obrigada nha prime.
Braças de sodade.
Musica que ta contá nôs estória, prima.
Um hino a nôs caboverdianidade.
Nôs peça em sê homenagem ta estreá 30 de Maio. Bô ta estóde li?
Um bijim grande pa bô.
Postar um comentário